السلام عليكم ورحمة الله وبركاته
عدنا من بعد غياب
طبعًا البعض كان يعتقد أن غيابي هو بسبب كلام الناس والمهاترات الكثيرة لكن كما ترون أنا لم أحذف أي تعليق ولم أحذف المدونة
ستظل المدونة مفتوحة بإذن الله والتعليقات فحسب التي بها سباب هي التي ستمسح
أعلم أنني في اليابانية ضعيف وبقول من الأول علشان محدش ييجي يوجع دماغي بعدين إني بنقد من السكريبت الإنجليزي الذي ترجم عليه المترجم فحسب
وإن كان المترجم لم يخطئ في السكريبت الإنجليزي لكن السكريبت نفسه كان سيئًا أو مغلوطًا فده مش ذنبي ولا ذنب المترجم
بالقدر الكبير في هذه المدونة أنا أحاول تصحيح اللغة العربية الجميلة لدى مترجمي الأنمي وهي المشكلة الكبيرة حيث تجد المترجم يعرف الإنجليزية لكنه ليس ملمًا بأساسيات اللغة العربية والمرادفات بين الإنجليزية والعربية المختلفة
مثال بسيط ممكن تلاقي جملة يابانية المترجم الإنجليزي ترجمها بما يوافق ثقافته ويفهمها المشاهدين
فمش تيجي حضرتك تترجمهالي زي ما هي
لا لازم برضه تحولها لما يناسب ثقافتنا
الخلاصة أنا هنقد إلي ييجي تحت إيدي وإلي عاوز ينقدني إنتوا شايفين إن حد عملها قبل كده وأنا نشرت موضوعه كاملًا ودافعت عن نفسي
كل واحد له مطلق الحرية يقول إلي هو عاوزه
عاوز تقول إني مش بفهم حاجة وكلامي كله غلط، عادي
عاوز تقعد تبجل في مترجم ما أنا انتقدت ترجمته ممرمطت بيها الأرض، ماشي
عاوز تخش تدافع عن نفسك أو توضح ليا أخطاء أو ما شابه، ده أنا أشيلك من على الأرض شيل
الترجمات إلي هنتقدها الآن هي لموسم أنميات الشتاء
نوضح الأول سبب الغياب
السنة النهائية من الجامعة ومشروع التخرج
ثم رحلة عذاب في تخليص أوراق الجيش
ثم فيري تايل في البحث عن وظيفة في ظل الأوضاع التي تمر بيها مصر
الحمد لله الظرفان الأولان خلصنا منهم
الظرف الأخير متحقق نصفه وماشي أهو الحمد لله في تحقيقه كاملًا
أنا مش هوعد بعدد معين لكن يوم الجمعة والسبت سيكون فيه غزارة (موضوعين أو ثلاث) عن باقي الأسبوع
بالنسبة للتعليق أنا سأفتحه للجميع علشان إلي مش عنده الشجاعة يواجهني أو يواجه غيري باسمه يقدر يكتب ومحدش يعرفه ويفضل متواريًا في الظلال
نلقاكم الأيام القادمة بإذن الله
ده لو حد لسه فاكرني أصلًا
